Howldrehevel – Geoff Orient
Yth yu seyth bledhen lemmyn aban wrugevy omvetya y’n kensa gans Geoff y’n dewotty ‘An Tavern Noweth’, yn Mabe. Yth esa-ny yn bagas a gernewegoryon neb re dhothya warbarth rag an gorthewer dhe gevranna an plesour a gescows ha, heb mar, neppyth dhe eva.
A-dhesempes, pan wrugevy dalleth clappya gans Geoff, my a wodhya bos omma den a alsa bos coweth da dhym – neppyth a vu prevys dres an bledhynyow a sewyas. Geoff re bya ow tysky Kernewek, hag y’n ur-na yth esa ef genen-ny dhe wellhe y Gernewek kewsys, neppyth a gowlwruge heb cudyn, kepar del vu dysquedhys y’n nessa bledhen, pan wruge sowynny yn y apposyansow.
Alena rag, my a spenas mur a dermyn gans Geoff, der agan ober yn un scothya an tavas, gonysegeth Kernow, hag yn whyr, puptra Kernewek, ha gans pup cuntellyans agan felshyp a devas creffa ha creffa. Der y frethter yn Kernewek, Geoff a dheth ha bos Barth an Orseth, ha kens pell a vu dewysys dhe servya war an Consel. Ny wruge y’m cof-vy, kelly marnas un cuntellyans, ha hen o dhe omdhysquedhes gans Sue abarth Kernow y’n Orseth Breten Vyghan. Ena ynweth, Geoff a wrug cowetha noweth – neppyth, del hevel dhym, o mar es ragtho gul.
Ha ny wrug Geoff marnas servya war Gonsel an Orseth, ef a gemeras ran yn puptra a vu restrys gensy. Mar mynnen-vy cafos neppyth gwres, po yth esa ethom dhe’n Scryvynyades a weres a nep eghen, bythqueth ny wrussa Geoff leverel, “ny allaf-vy.” Pupprys ef o parys dhe ry y scothyans. My a yl leverel avel Barth Mur, y whrussa Geoff, avel an den ova, avonsya pell ajy dhe’n Orseth. Ha nyns o ajy dhe’n Orseth yn unyk y whrug Geoff obery gans an keth dywysykter. Yn pup cowethas ef o an keth – mar pe chons dhodho ry gweres, ef a wrussa.
Geoff a gara mur an mor ynweth, hag a bewas y gok golya y honen, may whre-ef vyaja adro dhe Gernow ha trewythyow mos tramor dhe Vreten Vyghan. Ny a spena mur a owrow warbarth ow clappya adro dhe’n mor, ha drefen ow bos pyscajor nans yu lyes bledhen, ef a wrussa profya dhym mylyow a wovynnadow adro dhe’n mor ha fatel o taclow y’n dethyow mar bell. Del o usys, agan kescowsow warbarth a wrussa synsy ynna gwedren po deu a wyn, ha pupprys pan wren-vy leverel dhodho rag ensompel, “Prag ny wren-ny dos warbarth ha cafos clap – gans gwedren a wyn heb mar,” ef a wrussa myras orthyf-vy gans terlenter yn y lagas ha mynwerth bras, ha leverel an keth geryow, “hen a vya tybyans da.”
Ple ma’n gwyrvrus y’n bys-ma, mayth us den mar dha, mar lun a vewnans, ha murgerys gans kemmys ha dus, kemerys dhe-ves mar avar? Mes kyn feva kybyes yn maner mar fell dyworthyn-ny, ef a vyth genef-vy – ha genen-ny oll - dres agan bewnansow dyen.
Tewennow (Rod Lyon)
|
