Gorseth Breten Vyghan - 2005

Dres penseythen an 17ves a vys Gortheren, my ha’m gwreg eth dhe Vreten Vyghan dhe omdhysquedhes abarth Gorseth Kernow y’ga Gorseth ena. Del yu usys pub bledhen, an Orseth ma a wharfe dhe Vrasparz, hag yu desedhys adro dhe 40 myldyr dyworth an porth keybal Roscoff.

Ny a asas Aberplym war an keybal dhe 3 ur an dohajeth an de’Yow kens, ha wosa whegh owr war an mor, a dhrehedhas Roscoff nebes kens 9 ur (hen yu 10 ur owr Frynkek). An tremenyans o perfyth – gans an howl ow splanna ha’n mor kepar ha folen a weder.

Kyn na wrug wharfos solempnyta an Orseth kens myttyn de’Sul, ny eth mar avar rag deu acheson – kensa, drefen bos tokyn 5-deth an gwella bargen ha nessa, yth esa chons dhyn ny cafos copel a dhethyow ryth dhe vysytya leow adro dhe’n pow.

An solempnyta yu synsys dhe Brasparz war dam tyr re be prenys yn arbennek rag an porpos gans an Drewyth Mur Gwynnc’hlan a’n Orseth Breten Vyghan. Y’n lacca prys hevleny, ny alsa Gwynnc’hlan dos dhe’n Orseth drefen rag dalleth y vos ogas ha 80 bloth, ny yl ef kerdhes pell po omsevel termyn hyr, hag ynweth, ymava trygys lemmyn yn Toulouse, yn Pow Frynk deghow, hag yu heb mar, pell dyworth Brasparz yn Breten Vyghan. Y le ytho a ve kemerys gans y Gannas, Per Vari Kerloc’h, neb yu martesen 30 bledhen yowynca es Gwynnc’hlan.

Wosa an solempnyta, yth esen vy ow kewsel gans Per Vari ha nebes Byrth erel adro dhe Gwynnc’hlan, hag y a breder del wrava omdenna lemmyn, hag y le alemma rag kemerys gans Per Vari. Ny won pes bledhen y fe Gwynnc’hlan Drewyth Mur, mes y’n Orseth Breten Vyghan, pan vo nebonen gwres Drewyth Mur, yth yu rag bewnans. Bytegens, nebes a breder del goth bos hemma trelyes, hag y tal dhedha yn Breten Vyghan sewya patron a Gernow hag a Gembry, ha hen yu dhe gafos Drewyth Mur noweth pub tyr bledhen.

Breton Gorsedd 2005

Un dra na wrugevy kempolla whath yu an gewer. Dres an dethyow esen ny ena, yth o pur, pur dom, gans an howl ow splanna heb let ‘mes a ebren dhygomol. Ha nyns o deth an Orseth onen dyffrans nanyl. Ny a omsevys a dermyn da, ha wosa kemeres hansel, eth dhe’n dre dhe ombarusy rag an solempnyta. Hen o dhe dheg ur ha solabrys yth o pur dom. My a wodhya ragof vy gans ow gwysk bardhek mar bos y fya owr po owr ha hanter pur anattes der an tomder, ytho, ny vynnaf vy leverel dheugh an pyth a wrugevy – po ny wrugevy – gwysca yndan ow dyllas bardhek! Bytegens, yn herwyth an re erel, my a’n duryas, ha cafos solempnyta pur dha – kyn fe tam dyffrans es henna dhyn ny omma yn Kernow.

Wosa an solempnyta ny oll, gans nebes a’n poblek, eth dhe Hel an Dre, may whrussyn ny cafos kynyow splan. Del yu usuys hevleny, ow gwreg ha my a wrug lyes coweth noweth, neppyth a wren ny heb fyllel pup tro en ny dhe Vreten Vyghan.

Barth Mur Tewennow

Return to 'Welcome - News' page
Dewhel dhe folen 'Dynargh'